Richard Andree

Richard Andree.

Richard Andree (* 26. februara 1835 w Brunšwigu; † 22. junija 1912 w Münchenje) jo był nimski geograf a etnograf.

Žywjenje

Richard Andree jo w Brunšwigu a Lipsku pśirodowědy studěrował, wósebnje geologiju. W Lipsku jo 1857 do tamnjejšego studentskego korpusa Lusatia zastupił, kótaryž jo se 1807 załožył. Studentski korpus jo jomu pózdźej teke cesne cłonkojstwo wupóžycył. Kaž teke južo jogo nan Karl Andree (1808–1875) jo Andree głownje na polu geografije slěźił, a bywał pśez jogo etnografiske slěźenja teke daloko znaty.

W lětach 1859 do 1863 jo Andree zastojnik w českem górnistwje w kněstwje Křivoklát wjercha Maxa Egona von Fürstenberga był. W Lipsku, źož jo mjaz 1873 do 1890 kartografiski wustaw nakładnistwa Velhagen & Klasing nawjedował, jo se Andree zrazom z kartografiju zaběrał a měł wjeliki późěl pśi wuźěłanju a wudawanju šulskich atlantow a Physikalisch-Statistischen Atlas des Deutschen Reichs. Mimo togo jo był redaktor wědomnostnego casopisa Globus. Twórby Richarda Andreeja su teke Arnošta Mukowe slěźenja wó serbskem kulturnem žywjenju wobwliwowali. Wót 1903 jo był Andree z ludowědnicu Marie Andree-Eysn (1847–1929) z Awstriskej ženjony. W lěśe 1886 jo se wón na cłonka akademije wuconych Leopoldiny wólił a 1909 bywał cesny cłonk Berlinskeje towarišnosći za antropologiju, etnologiju a prastawizny (Berliner Gesellschaft für Anthropologie, Ethnologie und Urgeschichte).

Richard Andree jo w běgu jězby z śěgom wót Münchena do Nürnberga w starstwje 76 lět wumrěł.

Twórby (wuběrk)

Übersichtskarte von Afrika, 1886

• Das Amur-Gebiet und seine Bedeutung: Reisen in Theilen der Mongolei, den angrenzenden Gegenden Ostsibiriens, am Amur und seinen Nebenflüssen. Leipzig 1867 (online z wobstatka uniwersity w Rěznje).
• Wendische Wanderstudien. Zur Kunde der Lausitz und der Sorbenwenden. Stuttgart 1874.
• Chronik des Corps Lusatia zu Leipzig 1807 bis 1877. Auszug aus den Annalen des Corps, Leipzig 1877.
• Ethnographische Parallelen und Vergleiche. Stuttgart 1878.
• Zur Volkskunde der Juden. Bielefeld und Leipzig 1881.
• Andrees Allgemeiner Handatlas. Leipzig 1881–1937 (źewjeś wudaśow).
• Die Flutsagen ethnographisch betrachtet. Braunschweig 1891.
• Geschichte des Corps Lusatia zu Leipzig 1807 bis 1898. Leipzig 1898.
• Braunschweiger Volkskunde. Braunschweig 1901.

Wótkaze

•  Commons: Richard Andree – Zběrka wobrazow, widejow a audio-datajow
• Richard Andree - Literatura w katalogu Nimskeje narodneje biblioteki
• Droysens Allgemeiner Historischer Handatlas, 1886

Žrědła

• Erich von Drygalski: Andree, Richard. W: Neue Deutsche Biographie (NDB). Band 1, Duncker & Humblot, Berlin 1953, ISBN 3-428-00182-6, str. 285 (online).
• Wilhelm Haan: Richard Andrée. W: Sächsisches Schriftsteller-Lexicon. Robert Schaefer’s Verlag, Leipzig 1875, str. 6sl.
• Mechthild Wiswe: Andree, Richard. W: Horst-Rüdiger Jarck, Günter Scheel (wud.): Braunschweigisches Biographisches Lexikon – 19. und 20. Jahrhundert. Hahnsche Buchhandlung, Hannover 1996, ISBN 3-7752-5838-8, str. 28sl.
• Jan Šołta: Andree, Richard. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, b. 27sl.