Robert de Sterkn
Robert de Sterkn
Robert de Sterkn of Rutpert (ca. 830 – Brissarthe, 2 juli 866), van de familie van de Robertynn, was e belangryk lid van de Frankischn oadel in West-Francië binst de 9e êeuwe. Je krêeg zyn bynoame "de Sterkn" deur zyn militaire successn, surtout teegn de Vikings.
Je was e zeune van Robert III van Worms en voader van twi keuniengn van West-Francië: Odo I en Robert I. Je was ook overgrotvoader van Hugo Capet en dus de vôorvoader van ’t Huus Capet.
In 853 wierd ie angesteld deur Karel de Kletsn als missus dominicus (zendgroaf) in de regio’s Le Mans (Maine), Tours (Touraine) en Angers (Anjou).
In 861 creëerde Karel de Kletsn twi markn in Neustrië vo 't gebied te verdeedign teegn de Bretoenn en de Vikings. Je stelde Robert de Sterkn an als markgroaf teegn de Bretoenn, en Adalard de Seneschalk en de broers Udo en Berengar I van Neustrië als markgroaf teegn de Vikings.
Ip 2 juli 866 is Robert omgebrocht binst de Slag van Brissarthe in Neustrië. Robert vocht teegn e leger van Bretoenn en Vikings. De Bretoenschn hertog Salomon haad hem e tyd g’allieerd met de Deensche Vikingleider Hastein.
De Vikings haan under weggestookn in de kerke. Robert ha zyn zwoarn harnas ofgedoan. De Vikings vieln ’s nachts an en ze kostn Robert, die nie beschermd was, gemakkelyk van kant moakn deur hem dôod te sloan met e byle. Ranulf I, de groaf van Poitiers en hertog van Aquitanië krêeg e pyle deur hem en je stierf drie moandn loater an zyn verwoundiengn.