SMAD (proteína)

As Smads (ou SMADs) constitúen unha familia de proteínas estruturalmente similares, que son os principais transdutores de sinais da superfamilia dos receptores do factor de crecemento transformante beta (TGF-B), que son fundmentalmente importantes para a regulación do desenvolvemento e crecemento.

As Smad forman un trímero constituído por dous Smad reguladas polo receptor e un co-SMAD. Actúan como factores de transcrición regulando a expresión de xenes específicos.

Clases

Nos mamíferos existen oito Smad agrupadas en tres subfamilias:

1. As Smad reguladas polo receptor (R-SMAD) que inclúen SMAD1, SMAD2, SMAD3, SMAD5 e SMAD8/9
2. A Smad mediadora común (co-SMAD) que inclúe só ao SMAD4, e que interacciona con R-SMAD para participar na vía de sinalización
3. As Smad antagonistas ou inhibitorias (I-SMAD) que inclúen as SMAD6 e SMAD7, as cales bloquean a activación de R-SMAD e Co-SMAD.

Nomenclatura

As proteínas SMAD son homólogas tanto da proteína MAD da mosca Drosophila (polas súas siglas en inglés Mothers Against Decapentaplegic, onde "decapentapléxico" refírese a unha proteína da mosca homóloga á proteína morfoxénica ósea humana) coma da proteína SMA do nematodo Caenorhabditis elegans (do xene ''sma'' da palabra small, pequeno, debido á súa capacidade de alterar o tamaño corporal). O nome é unha composición das dúas.

Durante o estudo da Drosophila, atopouse que unha mutación no xene, MAD, na nai, reprimía o xene decapentapléxico (dpp) no embrión.

Cabelo

Demostrouse que a presenza de complexos Smad1/5/8 fosforilados e a Dlx3 regulan a función da vía de sinalización das BMP durante a morfoxénese do cabelo en certos modelos animais.