Sandrine Testud
|
C'l artìcul chè 'l è scrit in
Miranduléś |
La Sandrine Testud (Liòṅ, 3 'd Avrìl dal 1972) l'è stada na tenìsta francéśa prufesiunìsta da 'l 1989 a 'l 2005 ch'l'è rivàda a èsar la nùmar nóṿ dal mónd al 7 ad Favràr dal 2000. L'è élta 176 cm par 68 chilo e la dróa al bras dèstar.
L'à vins la Fed Cup cun la Frància in dal 1997.
In dla sò caréra l'à mis in bisàca 3.782.307 dòlar in tut e l'à śugâ déś finàli WTA vinsénd-an tri: in dal 1997 a Palèrum baténd l'Elena Makarova par 7-5 6-3, in dal 1998 a Stucàrda cóntar la nùmar dū dal mónd Lindsay Davenport 7-5 6-3 e in dal 2001 a Waikoloa faghénd fóra la Justine Henin, in alóra nùmar òt dal mónd, 6-3 2-0 bandòṅ. Cla finàla chè l'è stada śugàda vint-quàt'r óri dòp par via di atintâ d'l 11 Setémbar in di Stat Unî.
La Testud, anc se la n gh l'à mai cavàda a finìr in di prim sinc pòst, l'à da spés batû dal śugadōri dimóndi fòrti cuma la Monica Seles (3 vòlti), la Lindsay Davenport (2 vòlti), l'Arantxa Sánchez Vicario (3 vòlti), l'Amélie Mauresmo (2 vòlti), la Jennifer Capriati (4 vòlti), la Venus Williams (na vòlta) e anc la Serena Williams (2 vòlti a Stucàrda e na vòlta a gl'Australian Open). Ma anca lē la gh'à la sò bistiàsa négra: l'è la śvisra Martina Hingis ch'la l'à sèmpar batùda, par sédas vòlti!