Serafimovič (lidn)
Lidnanznam
|
Flag
|
| Valdkund | Venäma |
| Eläjiden lugu (2021) | 8,633 ristitud |
| Pind | 30,57 km² |
| |
| Pämez' | Tat'jana Il'jina (reduku 2014—) |
| Telefonkod | +7−84 464-xx-xxx |
| Avtokod | 34, 134 |
| Aigvö | UTC+3 (MSK+0) |
Serafimovič (ven.: Серафимо́вич) om Venäman lidn Volgogradan agjan päivlaskmas. Se om Serafimovičun rajonan lidnankund da administrativine keskuz.
Istorii
[vajehta | vajehtada lähtetekst]Eländpunktan aluz om pandud vl 1589 kuti Ust'-Medvedickai-stanic (ven.: станица Усть-Медведицкая) Donan hural randal. Aigan mändes sirtihe Medvedic-lidnut korktha oiktaha randha sur'veziden tagut. Vl 1933 stanic sai lidnan statusad nügüdläiženke nimenke, Aleksandr Serafimovič-kirjutajan oiktastuseks.
Serafimovičun ižandusen päsarakod oma sömtegimišt (jauhtegim, elevatorad, voisagudkombinat) da turizm.
Geografijan andmused
[vajehta | vajehtada lähtetekst]Lidn sijadase Don-jogen oiktal randal, 110 m keskmäižel korktusel valdmeren pindan päl. Reljef om vanoikaz. Medvedic-jogensu om vastrandal, kahesas kilometras Donan ülezjogen.
Matkad Volgogradhasai om 160 km suvipäivnouzmha orhal vai 260 km avtotedme. Lähembaine lidn om Frolovo 70 km päivnouzmha orhal vai 120 km avtotedme Mihailovk-lidnan kal't.
Tobmuz
[vajehta | vajehtada lähtetekst]Serafimovič om lidnankundan üks'jäižeks eländpunktaks.
Lidnankundan tobmuden pämez' om sen Administracijan pämez'. Lidnan Nevondkundan ezimez' om Natalija Kičapova vn 2023 redukuspäi. Edeline Nevondkundan ezimez' om Ol'ga Gordejeva (kül'mku 2018 — refuku 2023).
Eläjad
[vajehta | vajehtada lähtetekst]Vn 2010 Venäman rahvahanlugemižen mödhe lidnan eläjiden lugu oli 9 368 ristitud, rajonan ristitišton kaks' videndest. Vl 2017 kaik 8 987 ristitud eliba lidnas. Kaikiš suremb lidnan ristitišt oli enamba 10 tuhad eläjid vozil 1979−1998 (10 200 rist. vl 1996).
Ortodoksižen hristanuskondan kuz' pühäpertid[1] ratas lidnas: Sündun Eläbzdusen (1782) i Pühän Jumalanmaman Katken (1896) jumalanpertid, Ust'-Medvedican Spasan Toižetamižen naižjumalankodi (alusenpanend 1638) nellänke pühäpertinke. Sen jumalankodin pühäpertid oma Kazanin Jumalanmaman päjumalanpert' (om saudud vll 1874−1885), ph. Mikulai-čudonsädajan jumalanpert' kellčuhunduses (sätihe vll 2001−2008), Spasan Toižetamižen puine jumalanpert' (letihe vll 2003−2009) i ph. Serafim Sarovalaižen puine časoun' (2014). Niiden ližaks ph. Aleksandr Nevalaižen jumalanpert' (1889−1935) kaumžomal ei ole kaičenus.
Serafimovičun maižandusen mehanizacijan tehnikum[2] om lidnan specialižen keskopendusen aluzkundaks.
Transport
[vajehta | vajehtada lähtetekst]Avtobusad, maršruttaksid da taksid oma kundaližeks transportaks lidnas da sen ümbrištos. Avtotesild ühtenzoitab Donan randoid lidnan pohjoižen röunan taga.
Lähembaine Sebräkovo-raudtestancii sijadase Mihailovk-lidnas 84 km pohjoižpäivnouzmha avtotedme.
Galerei
[vajehta | vajehtada lähtetekst]-
Torgovanoiden skver (2020) -
Spasan Toižetamižen jumalanpert', vn 2012 nägu -
Sündun Eläbzdusen jumalanpert', vn 2017 nägu -
Serafimovičun maižandusen mehanizacijan tehnikum (2009) -
«Don»-kinoteatr vl 2009
Homaičendad
[vajehta | vajehtada lähtetekst]- ↑ Serafimovičun pühäpertid sobory.ru-saital. (ven.)
- ↑ Serafimovičun maižandusen mehanizacijan tehnikuman sait (стмсх.рф). (ven.)
Irdkosketused
[vajehta | vajehtada lähtetekst]- Serafimovičun lidnankundan tobmuden sait (serafimadmin.ru). (ven.)
- Lidnan informacine sait (усть-медведицкая.рф vai serafimovich.org). (ven.)
 |
Serafimovič (lidn) Vikiaitas |
| Volgogradan agjan lidnad | ||
| Dubovk | Frolovo | Kalač Donal | Kamišin | Kotel'nikovo | Kotovo | Krasnoslobodsk | Leninsk | Mihailovk | Nikolajevsk | Novoanninskii | Pallasovk | Petrov Val | Serafimovič | Surovikino | Žirnovsk | Urüpinsk | Volgograd | Volžskii | ||