Tazara-spoorlyn
Die Tazara-spoorlyn (die afkorting staan vir Tanzania & Zambia Railway Authority) is 'n spoorverbinding in Midde-Afrika oor 1 860 km tussen Kapiri Mposhi in Zambië en Dar-es-Salaam, Tanzanië, se besige uitvoerhawe. Die spoorlyn is in 1976 met Chinese befondsing voltooi ten einde Zambië se afhanklikheid vir die uitvoer van sy koper deur hawens in die suide te verminder.
Sedert 10 Oktober 2008 loop twee dienste weekliks op die spoorlyn, die een 'n sneltrein en die ander 'n gewone. Die sneldiens vertrek Dinsdae byna terselfdertyd uit Dar-es-Salaam en Kapiri Mposhi en kom twee dae later by die teenoorgestelde bestemmings uit, terwyl die gewone diens Donderdae van albei teenoorgestelde eindpunte vertrek om Sondag in onderskeidelik Kapiri Mposhi en Dar-es-Salaam aan te kom.[1]
