Towerkrag

Towerkrag in die okkultisme is die vermoë om toegang te kry tot die een of ander bonatuurlike krag wat nie normaalweg beskou word as 'n menslike vermoë nie. Met towerkrag probeer iemand om die natuur te onderwerp aan die wil van die mens en dit word gedefinieer as: "Die kuns en wetenskap om verandering te bewerkstellig in samewerking met wilskrag". Metodes en tegnieke word ondersoek wat lei tot bewustelike evolusie deur die rig van energie en om bewustelik toegang te kry tot vermoëns soos intuïsie, inspirasie en kreatiewe verbeelding.

Die idee van towerkuns is dat die wêreld bestaan uit subtiele energie wat gerig kan word om verandering te bewerkstellig. 'n Groot fokus word dus geplaas op die gedissiplineerde ontwikkeling van verstand, wilskrag en bewussynsvlakke. Towerkuns vereis as basis 'n gebalanseerde lewe met 'n stabiele en geïntegreerde karakter. 'n Groot klem word dus geplaas op die ontwikkeling van 'n individu.

Towerkrag gaan baiemaal gepaard met rituele, simboliek asook towerspreuke om die towerkragte te manipuleer.

Voorbeelde van towerkrag is:

• Astrale projeksie
• Onsigbaarheid
• Om deur vaste strukture te beweeg.
• Telepatie
• Telekinese
• Die beweeg van voorwerpe sonder om fisiek daaraan te raak.
• Die vermoë om met diere te kommunikeer
• Die heling van siektes
• Vormverandering
• Alchemie

Towerkuns word onderskei van kulkuns, wat te doen het met oëverblindery waardeur die towenaar die gehoor mislei met goed beplande truuks. Kulkuns word gewoonlik as vermaak aangebied.