Universo
E universo den astronomia, of kòsmòs den kosmologia, ta henter e sistema kósmiko di materia i energia paden di e kontinuo di espasio-tempu.[1] E kontinuo aki ta implika ku e ta un struktura kuater dimenshonal den kual espasio tridimenshonal huntu ku tempu ta den un modèl.
Orígen
[editá | editá fuente]Ta eksistí diferente teoria sientífiko tokante e orígen di e universo. Esnan ku mas a ser aseptá ta esun di e gran eksploshon (Ingles: big bang) i e teoria inflashonario, ku ta komplementá otro.
E teoria di gran eksploshon ta propone ku e inisio di e universo a resulta di un solo punto kayente i denso (tambe konosi komo singularidat).[2] Tur e espasio, materia, i energia di e universo konosi tabata konteni den un volumen menos ku uno di trion parti e tamaño di e punto na fin di frase aki. Aunke e ta diskonosi ainda kon e punto kósmiko aki por a bin na eksistensia, e kòsmòs aki por a solamente ekspandé, rapidamente, den kual awendia ta yama e gran ekslposhon.[3]
Investigando galeksianan na kuminsamento di siglo 20, astrónomo merikano Edwin Hubble a realisá ku nan tur tabata parse ta kore bai for di e Kaminda di Lechi.[4] Asina el a konfirmá ku e universo tabata ekspandé den tur direkshon, un fenómeno ku Albert Einstein a pronostiká ku su teoria general di relatividat na aña 1916.[5] E ekspanshon kósmiko tambe ta aselará. Esaki a resulta di astrónomonan na 1998 ku a haña ku sierto supernovanan, eksploshon selestial briante, tabata mas suak ku nan a ferwagt. Asina nan a konkluí ku esaki por a sosodé solamente si e supernovanan a move mas leu, na un velosidat mas lihé ku a pronostiká.[6]
Inflashon kósmiko
[editá | editá fuente]Alrededor di 13.8 bion aña pasa, e universo a ekspandé mas lihe ku e velosidat di lus pa un frakshon di un sekònde; esta 10-32 sekònde, e periodo aki yama inflashon kósmiko. Sientifiko kosmologiko ta kere ku inflashon kósmiko ta splika varios aspektonan di e universo, por ehempel e forma plat di e universo, of falta di kurva, ariba e eskala mas grandi (p.e., galaksia). Inflashon tambe lo por a magnifika diferensianan den densidat ku ta aparese, di naturalesa, den espasio su eskala mas chikito; esta nivel di quantum, kual eventualmente a yuda forma universo su strukturanan di gran eskala.[6]
Gran eksploshon i síntesis di núkleo
[editá | editá fuente]Ora inflashon kósmiko a para, e energia ku a dirigi'e a transmiti pa materia y lus—e gran eksploshon (Ingles: big bang). Un sekònde despues di e gran eksploshon, e universo a konsisti di un sòpi primordial ekstremadamente kayente (10 bion grado Celsius) di lus y partíkula. Den e siguiente minütnan, un era yama síntesis di núkleo, proton i neutronnan a dal den otro i a produsi e prome elementonan; esta hidrógeno, helium, i rastronan di lithium i beryllio. Despues di sinko minüt, un gran parti di helium di awendia a forma, i e universo a ekspandé y fria sufisiente pa para e produkshon di elementonan. Aunke, na e punto aki, e universo ainda tabata mucho kayente pa núkleo atómiko di e elementonan aki por a fangu elektronnan i forma atom kompleto. E kòsmòs no tabata transparente pa e motibu ku un gran kantidat di elektronnan lòs tabata krea un tipo di neblina kósmiko cu ta plama lus.[6]
Rekombinashon
[editá | editá fuente].jpeg?lang=pap)
Alrededor di 380,000 aña despues di e gran eksploshon, e universo a fria sufisiente pa núkleo atómiko por a funga elektronnan, un periodo ku astrónomonan ta yama e epoka di rekombinashon. Esaki tabatin dos efekto ariba e kòsmòs. Na promé lugá, ku mayoria di elektron ta mará na atomnan, no tabatin elektron lòs mas pa plama lus, i e neblina kósmiko a klara. E universo a bira transparente i lus por a biaha libermente ariba distansianan grandi. Segundo, e formashon di e prome atomnan aki a produsi su mesun lus. E briyo aki, ku ainda por wòrdu detektá, ta yama Fondo di Mikroonda Kósmiko. E ta e lus di mas bieu ku nos por opservá den universo.[6]
Edat skur
[editá | editá fuente]Despues di e Fondo di Mikroonda Kósmiko, e universo a bolbe bira no transparante pa lus di largura di ondanan mas kortiko debí na e efektonan di absorbashon di atomnan hidrógeno. Pa e siguiente 200 mion aña e universo a keda skur, no tabatin ninguin strea. E kosmos na e punto aki tabata konsisiti di un laman di atomnan di hidrógeno, helium, i spor di elementonan mas pisa.
Promé streanan
[editá | editá fuente]Gas no tabata distruibuí den un forma uniforme den universo. Areanan mas friu di espasio tabata mas denso ku neblina di gas. Segun e nubianan aki a bira mas masivo, nan gravedat a atraé materia adishonal. Asina ku nan a bira mas denso i kompakto, e sentronan di e nubianan aki a bira mas i sufisientemente kayente pa eventualmente fushon nuklear a tuma lugá na nan sentro. Esaki tabata e promé streanan. Nan tabata 30 pa 300 biaha mas masivo cu Solo i miones di biaha mas briante. Durante vários shen mion aña, e promé streanan a aglomorá den e promé galaksianan.[6]
Propiedat físiko
[editá | editá fuente]Tamaño
[editá | editá fuente]Debí na e velosidat fiho di lus, tin un límite (konosí komo e horizonte di partíkula) pa kon leu lus por biaha durante e edat di universo. E region di espasio for di kua nos por risibí lus ta wòrdu yama e universo opservabel. E distansia (midi na un tempu fiho) entre Tera i e rand di e universo opservabel ta 46 bion aña lus, hasiendo e diamter di e universo opservabel mas o ménos 93 bion aña lus.[8][9]
Komposishon
[editá | editá fuente]Vários kálkulo a demostrá ku tur materia i energia konosi ta hopi tiki en relashon ku e materia i energia aktual. Mayoria di e kontenido di universo ta di un forma ku aktualmente no ta konosi pa fisika moderno. E ta konsisti pa un gran parti di energia skur, materia skur, i materia normal.
Mas o menos 68% di energia total di universo ta kompone di energia skur, un forma hipotétiko di energia ku ta parse di aparese den vakūm di spasio-tempu i ta kousa e eskpanshon di e universo pa aselerá. Aproksimadamente, 27% di materia i energia di universo ta komponé di materia skur. E ta un forma invisbel di materia ku no tin interakshon ku henter e spektrum elektromagnétiko, por ehempel energia skur no ta absorba ni emití lus, pero e tin interakshon ku e resto di universo prinsipalemente via gravedat. En realidad, sientifikonan ta propone ku e ta e struktura ku ta trese materia normal hunto pa krea por ehempel galaksianan. E 4.9% ku ta sobra di e universo ta konsisti di materia normal i konosi manera burako preto, strea, planeta, neblina di gas, i kometa.[5] Alafin, 0.1% i 0.01% di e universo ta konsisti, respektivamente, di neutrino i radiashon (foton).[10]
Fuente, nota i/òf referensia
|