Vergíliu

Virgilio
Enhormación pressonal
Nombre en latín	Publius Vergilius Maro
Nacencia	15 de octubre de 70 a. C.jul. Andes (Galia Cisalpina, República romana)
Muerti	21 de septiembre de 19 a. C.jul. Brindisi (Italia antigua, Empériu romanu)
Sepoltura	Parque Vergiliano a Piedigrotta
Lengua materna	Luenga latina
Familia
Madre	La madre de José
Enhormación profissional
Oficiu	Poeta y escrevienti
Movimientu	Poesía augusta
Género	Epopeya y Bucolismo

Mosaicu tuníziu Vergíliu.

Vergíliu (en latín Publius Vergilius Maro ['puːblɪʊs wɛrˈgɪlɪʊs ˈmaroː]) hue un poeta latinu, el mayol épicu las letras latinas, utol la Eneida.

Via

.

Vergíliu tuvu nacéncia en Andes (ogañu Pietole), un puebrinu arrimau a Mantua, el 17 Outubri el 70 e. C. La su família era probi, namás consiguió algu de capital de que el pairi se casó con Mágia Pola, la ija el manigeru pal que trebajaba.

Públiu passó quandu niñu el tiempu en Mantua hata que a la eá de dozi añus aballó a Cremona cona família. Nesti monicípiu empençó los primerus estuyus. Nel 55 e. C. recebió la toga viril, lo que suponia la mayoria eá, de mois que acontinó los sus estuyus nuna ciá de mayol emportáncia, en Mediolanum (ogañu Milán), andi deprendió retólica, melecina i matemáticas. Unus poquinus d’añus endispués, aballó a la final a Roma, pa acabijal los sus estuyus i enicialsi al foru. Pero el temperamentu Vergíliu, languiosu i runatu, demaseau velgonçú pa esponel en púbricu, malingreandu a ca no ná i d’ánimu escachizu, abaldonó la hablatória de que conoció a los puetas nuevus. P'aquellus tiempus escomiença la su carrera comu escrebienti i pueta.

Siguin unus añus envarbascaus en que el pueta entra en contautu cona filosofia, raceandu pa la escuela Sirón, en Neapolis (ogañu Nápoli). La família s’engarronchonó ena guerra cevil, perdiendu la hazienda de pa Mantua, endispués la batalla de Filipu, nel 42 e. C. Tres estus tiempus regüeltus, escrebi las Georgicae, la obra que lo envencija pal déssitu, topandu el patronalgu Mecena i el própiu Agustu.

Desemprecupau pol capital, aballa a Neapolis, andi s’ensota nel escrebieru la su obra puética, espubricandu una segunda eición las Georgicae nel 29 e. C. Tres añus endispués se tien enteracionis de que Vergíliu bia encetau el gran puema épicu la Eneida, obra que se destendió hata su muerti i que no le vagó pa alimala. Tol afán de Vergíliu era escrebil una obra memorabri i correuta, de mois que pa dal mayol verisimilitú al puema estaba en idea de viajal a Grécia i arrecorrel los sítiu pondi ahilaba la estória Enea. Assinque nun barcu que diba pa las Atenas se montó i al cabu llegó. Pero las malotias que padecia pol viagi i la su escachiza salú prevocarun que maleara. En llegandu a la ciá griega, tuvu que gorvel, pusiéndusi mu maletu, en compaña Agustu que regressaba pa Roma dende Salienti. Hue escapás de allegal a Brundisium andi espenó dallá a unus poquinus dias, el 21 Setiembri el 19 e. C. El cuelpu lo muarun a Neapolis, la su segunda ciá, i lo intierrarun junta al caminu que conduzi a Puteoli (ogañu Pozzuoli).

Obra

Inlustración las Geórgicas, nel Vergilius Romanus.

Vergíliu hue referenti ena literatura latina i nel mundu las letras univelsalis pol bel escritu las Eclogae i prencipalmenti la Eneida. Inque no le petaba el salieru púbricu, Vergíliu cobró tanta fama que los sus velsus llegaban a sel escritus enas parelis las ciais romanas.

La muerti Didu, nel Vergilius Vaticanus.

Las obras joventú están arrecogias nel Apendi Vergiliana (Appendix Vergiliana), enque las composicionis tien autoria duosa, muchas paicin sel própias Vergíliu.

La primel obra que espubricó huerun las Eclogae, tamién conocias comu Bucólicas, un haci dies puemas pastorilis con hundón políticu i social.

Las Georgicae, obra agrícola, ganaera i apícola en quatru librus —ca unu de 550 velsus—, hue la segunda las obras qu’espubricó. Tuvu mu güena acogia pol parti el púbricu romanu, enque se tratara duna obra encargá.

La su obra mas cimera hue la Aeneis, la “Eneida”, obra que supusu un mistériu alampón pa los sus siguioris pol tol Empériu, al final la su via, entrigandu hata al própiu Agustu. Vergíliu enjamás puu arrematala, pos la muerti lo entalló sin bela alimau. Más, enantis de dal la boqueá, mandó que le prendieran huegu a aquel puema, cosa que, craru está, no hizun. L’obra s’encasulla endrentu el géniru épicu, pero con grandi innovacionis dende el géniru estalachau pol Omeru. S’estronca en dozi librus enos que se relata el viagi Enea dende el esbarrumbamientu Troya hata hundal los orígin el puebru romanu nel Láciu. Supusu el puema mas afamau las letras latinas i muestra crara la epoca agústia.

Bibliografia

• Virgilio, Eneida, entrod. J. L. Vidal, trad. J. de Echave-Sustaeta, Mairil, Gredos, 1982.
• — Bucólicas. Geórgicas, entrod. J. L. Vidal, trad. T. de la Ascensión Recio García, Mairil, Gredos, 1982.
• — Eneida, ed. J. C. Fernández Corte, trad. A. Espinosa Pólit, Mairil, Cátedra, 2004⁹.

Atijus

• En Commons ai conteníu multimedia sobre Vergíliu.
• Obras Vergíliu en latín, ena Latin Library.
• Virgilio y la Eneida, en Filología Clásica (en castellanu).
• Georgicae "Geórgicas" trad. en castellanu.
• Georgicae "Georgics" trad. en ingrés.
• Eclogae "Bucoliques" trad. en francés.
  • Datos: Q1398
  • Multimedia: Virgil / Q1398
  • Citas célebres: Virgilio
  • Textos: Autor:Virgilio