Vittorio Pozzo
 |
Vos an lenga piemontèisa |
| Për amprende a dovré 'l sistema dle parlà locaj ch'a varda sì. |
 Vittorio Pozzo a l'era nassù a Turin ai 2 ëd mars dël 1886 e a l'é mòrt a Pondran (Ponderano an italian, an Provincia ëd Biela) dël 21 dë dzèmber dël 1968. A l'é stàit giornalista sportiv e alenador ëd la squadra nassional ëd fótbal dl'Italia. Student dël liceo turinèis Cavour, a l’é stàit un dij primi giugador dël Turin FC, dont a l’é prest diventà alenator. Ant ël 1914 a l’ha organizà na tournée dla squadra granata an Brasil e an Argentin-a: ij giugador dël Tòr ëd coj temp-là a l’han vinciù tute le ses partìe giugà an Brasil, e an Argentin-a a l’han batù la Nassional, con gran gòj dij Piemontèis e dj’Italian emigrà ant la Mérica dël Sud. A l’é stàit ant la dirigensa dël Turin fin-a al 1922, quand ch’a l’é trasferisse an Svìssera për travaj. Peui a l’é dventà giornalista ’d La Stampa. A l’era ‘dcò dirigent ëd la Pirelli. Ant j’agn Tranta, Pozzo a l’è dventà alenador ëd la Nassional italian-a, an vagnand doi campionà dël mond (1934 e 1938) e l’òr a le Olimpiadi ‘d Bërlin dël ‘34, ma a l’é semper stàit tacà a la squadra dël Turin. Ant ël ’39, quand che Ferruccio Nòvo, ël pì grand president ëd la stòria granata, a l’ha catà 'l Turin con l’intension ëd costrùe na squadra fòrta e competitiva, a l’é stàit pròpi Pozzo a deje le drite giuste për formé la squadra dël Grand Turin, che peui a sarìa dventà la squadra ’d fotbal pì fòrta dël mond. Quand che ai 4 ëd Magg dël ‘49 a l’é suceduje la disgrassia ’d Superga, a l’é stàit Vittorio Pozzo a pijesse l’angossant incarich d’arconòsse ij còrp dij giugador dël Tòr, che chiel a conossìa motobin bin, vist che a j'ero lor ch’a componìo la magior part ëd la formassion ëd la Nassional che chiel a alenava. |
