Wikipedia:Proxectos pedagóxicos

Por que utilizar a Galipedia
en clase?

Formar o alumnado e estudantado a usar de forma intelixente a Galipedia é primordial. Para conseguilo, nada mellor que axudalos a pasar do status de lector/a ó de editor/a.

É un feito: o alumnado e o estudantado utiliza masivamente a Wikipedia, ás veces con usos inaxeitados- copiados-pegados, ausencia de revisión das fontes etc. Por iso hai grande interese en formalo no uso correcto desta ferramenta e a desenvolver o seu espírito crítico.

Máis alá da sensibilización, facer redactar o alumnado na Galipedia permite confrontalo a unha comunidade laboral real, educalo no traballo colaborativo e proporcionarlle unha educación dixital. Outra vantaxe é a satisfacción que produce un traballo publicado inmediatamente e dispoñible en liña (fronte a uns deberes realizados en papel e que ó pouco tempo serán desbotados). A contribución a Galipedia obriga finalmente á investigación documental, xa que toda información, para ser engadida, ten que estar referenciada, e permite o desenvolvemento de coñecementos sobre o respecto ós dereitos de autoría e as licenzas libres.

Saber máis

Profesorado
Como levar un proxecto pedagóxico sobre a Galipedia?

Alumnado e estudantado
Descubrir a Galipedia e contribuír.

Testemuños

Aquí abaixo, algúns testemuños de profesorado que realizou proxectos pedagóxicos sobre Wikipedia.

[...] Finalmente, o alumnado que manifesta unha destreza evidente na manipulación das ferramentas dixitais presenta grandes lagoas nas competencias da información: estratexias de investigación, de selección e de avaliación; aptitude para reutilizar a información de maneira pertinente; produción; reflexión crítica. Non obstante, cando todos os días se abren novos camiños cara ó coñecemento (lugares do saber virtual), estas ferramentas son aliadas para instaurar unha pedagoxía renovada e enriquecida de prácticas persoais e non formais, creativas e colaborativas.

Sra. Fourcassies, profesora de literatura, e Sra. Torralbo, profesora documentalista, 2015 (fonte (en francés))

[...] Reprochamos á Wikipedia o que fai falta reprochar ó alumnado: o mal uso dunha ferramenta. [...] Agora ben, non é tarefa do profesorado mostrar a diferenza entre o papagaio sabio e o alumno que vai utilizar os coñecementos recibidos para transferilos nunha situación ou nun pensamento persoal? Debemos entón esconder esta Wikipedia que non sabemos comprender, ou pola contra explicarlles como servirse da ferramenta?

Celia Guerrieri, profesora de literatura moderna, 2013 (fonte (en francés))

[...] Ó igual que para Internet, para as redes sociais, ..., é máis interesante educar o alumnado nos bos usos das ferramentas dixitais, explicarlles os riscos, os límites, as posibilidades... antes que opoñerse, aducindo que todo o saber que non procede dunha autoridade oficial e/ou establecida non ten o seu lugar na escola.

Pauline Le Gall, profesora documentalista, 2015 (fonte (en francés))

Consultar a Wikipedia pode darlle a impresión ó usuario de que experimenta unha certa habilidade [...]. Non obstante, as regras de produción de artigos en Wikipedia son relativamente complexas. A este respecto, é esencial que o alumnado ou o estudantado teña que manipular as regras que son a base do funcionamento tanto técnico como editorial deste dispositivo. Trátase de facerlles comprender que se relacionan con saberes construídos. Con todas as disciplinas mesturadas, Wikipedia pode permitir neste momento traballar competencias en investigación de información e lectura/escritura. O traballo do alumnado pode ser corrixido polos demais editores e toma entón unha dimensión de comunicación real.

Karine Aillerie, encargada de experimentos e de supervisión, Dirección da investigación e do desenvolvemento dos usos do dixital educativo, CNDP, 2013 (fonte (en francés))

↑ Subir