Wilhelm Wundt

Wilhelm Wundt (1832 - 1920) ia es un psicolojist deutx e la fundor de la teoria conoseda como struturalisme, o voluntisme. El ia es la instruor de multe psicolojistes famosa de la sentenio 20.

Wundt

Wilhelm Wundt ia nase en la vileta Neckerau en Baden, Deutxland a 16 agosto 1832. La fio de un pastor luteran, el ia es un xico solitar e studiante. El ia coabita e ia es educada par la aidor de sua padre, la parocior de la eglesa. El ia es enviada a un scola abitada cuando el ave 13 anios, e la universia con 19 anios.

El ia studia medica a Tubingen, Heidelberg, e Berlin, an con ce el ia es plu interesada en la aspeta siensal ca en un carera en medica. En 1857, el ia es asinia la rol de "dozent" (instruor) a Heidelberg, do el ia presenta psicolojia. De 1858 a 1864 el ia servi ance como un aidor a Helmholtz, un fisiolojiste famosa, e ia studia la stimula neurolojial e cimical de musculos.

En 1864, el ia deveni un profesor aidante a Heidelberg. Tre anios plu tarda, el ia comensa un curso cual el ia nomi psicolojia fisiolojial, cual ia foca sur la borda entre fisiolojia e psicolojia, pd la sensas e reatas - un interesa inspirada par la obras de Ernst Weber e Gustav Fechner. Sua notas de lesones ta ultima deveni sua obra major, la "Prinsipes de psicolojia fisiolojial" (Grundzüge der physiologischen Psychologie), cual ta es publica en 1873 e 1874.

Como Fechner e multe otras a la periodo, Wundt ia aseta la idea de Spinoza de paralelisme psicofisical: Tota avenis fisical ave un lado mental, e tota avenis mental ave un lado fisical. E el crede, como Fechner, ce la disponablia de stimulas e respondes mesurable pote resulta en abri avenis psicolojial a alga cosa simil a metodolojia esperimental, en un modo cual filosofistes plu temprana, como Kant, ia crede nonposible.

La metodo cual Wundt ia developa es un tipo de introspeta esperimental: La rexercor debe oserva multe atendente un aveni simple - un cual pote es mesurada per cualia, intensia, o dura - e rejistra sua respondes a varias de esta avenis. (Nota ce, en filosofia deutx alora, sensas ia es videda como avenis psicolojial, e donce interna a la mente, an si la sensa es de alga cosa esterna la mente. Alora, nos pote posible nomi la introspeta de Wundt como oserva!)

Struturalisme o Voluntisme

Wundt es joiante un revive de popularia, su la nom "struturalisme" - an si el ia prefere "voluntisme". Plu ca 100 anios pos sua laboras, nos ia ateni el final. Vera, el ia es malrepresentada seria par la studiantes american con sua deutx povre, e spesial par Titchener, un studiante engles cual ia es propulsada par sua ego grande. Wundt ia reconose esta, e ia atenta avisa persones de la problem. Ma Boring - la istoriste de psicolojia american xef per multe anios - sola aprende de Wundt par leje Titchener.

Un malcomprende conserna la titulo de un obra major: Psicolojia fisiolojial. Ma la parola "fisiolojial" ia sinifia orijinal "esperimental", pd usante la metodos de fisiolojia (ma no la metodos esperimental de la conduistes de la sentenio de 1900).

Wundt e sua studiantes ia usa un varia esperimental de introspeta - la oserva atendosa de persepis - e ia developa alga detalias spesifada per la metodo:

1. La oservor debe sabe cuando la esperia comensa e fini.

2. La oservor debe manteni un "atende tensada".

3. La fenomeno debe es capas de repete.

4. La fenomeno debe es capas de varia - cual es per dise, esperimenta.

Per esemplo, en la caso de sensas, lo ia es concluida ce on ave sete "cualias" de sensas: vide, oia, ole, proba (de sabor), toca, cinestesia, e organal. Alga de estas ave plu aspetas. Vide, per esemplo, ave tinje, satura, e valua. E cualias pote varia en intensia, dura, brilia, e (per vide e toca) estende.

La laborerias de Wundt ia es multe produosa, descrivente cosas como atende elejente, memoria de dura corta, etc - an incluinte la limitas famosa de memoria de dura corta a sirca sete "pesos" de informa, cual no ta es notada plu denova asta la desenio de 1970.

Consensa

Un de la cosas cual causa ce la obras de Wundt pare tan strana a psicolojistes american ia es cual el ia nomi la prinsipe de realia: El ia dise ce consensa es, en fato, un realia, e ce lo es la sujeto de studia de psicolojia. Es es, serta, vera - ma nos ia iniora lo per alga 80 anios en cuando conduisme ia rena la mundo academial en la SUA, Britan, e Rusia.

Prosedes mental es un ativia de la serebro, e no materia. Wundt ia asetada la metafisica de duple-aspetisme de Spinoza e ia spende multe labora en refuta reduisme. El ia crede ce consensa e sua ativias no conveni la modeles de siensa fisical, an si psicolojia emerji de biolojia, cimica, e fisica. Con acel emerji, consensa ia gania un capasia per sintese creosa - un otra conseta clavin de Wundt.

An si consensa opera "en" e "tra" la serebro fisical, sua ativias no pote es descriveda en termas de cimica o fisica. La color blu, la sona de un acorda de E minor, la sabor de salmon fumida, la sinifia de un frase... tota es avenis psicolojial e sujetal, con no esplicas fisical simple. Cuando deveni acel longia de un onda de lus, la ativia en la retina, la inisia de un neuron, etc, deveni "blu"?

Wundt ia ance premostra la psicolojistes de Gestalt en la rejeta de la asosisme de Locke e Hume: Strutures psicolojial es plu ca sola la soma de sua partes.

El e sua studiantes ia conclui ce consensa es composada de du partes: Prima on ave un consensa con un capasia grande, nomida la "Blickfeld" ("campo de vide"). E ance, on ave un consensa plu streta nomida "Apperception", cual nos pote tradui como atende elejente, cual es su la controla de vole e move en la Blickfeld. Esta idea de atende elejente ia deveni multe influente. Lo ia condui, entre otra cosas, a la teoria de scizofrenia de Kraepelin, cual vide lo como un rompe de la prosedes de atende.

Psicolinguistica

Un otra aspeta de la psicolojia de Wundt ia es sua psicolinguistica, cual prende la du prima libros de "Volkerpsychologie". Wundt ia sujesta ce la unia fundal de lingua es la frase - no la parola o la sona. El ia identifia la frase no sola con un segue de parolas e sonas, ma como un state mental spesial. Sonas, parolas, la regulas de gramatica, etc, tota ave sua sinifia sola en relata a la frase mental a su.

Wundt ia inventa la grafica arborin de sintatica con cual nos es tota familial en testos linguistica. Lingua comensa con la S (frase, de engles "sentence") a la culmina, e atende elejente separa la sujeto (foca o figur) e la predica (la fondo), etc, en contrasta con la conseta asosiste popular cual progresa de la basa a la alta, cual ia es proposada par la conduistes. Esta ideas de Wundt es aora la norma - an si nun recorda ce esta ia es la sua!

Regardante la lingua de enfantes, Wundt e sua seguores ia proposa ce lingua ave sua orijinas en sonas e jestis - un otra teoria cual es reveninte a popularia.

Emosias

Seguente Wundt, nos es prima viventes de emosias. Tota de nosa ativias mental inclui emosia. E emosia presede pensa! El ia es serta un romanticiste (en la sinifia filosofial).

El ia usa termas variosa: Sentis es cual es nomi la esperias fundal e corta. Umores ia es la varias plu longa. Emosia ia es la esperias plu complicada. E motivas ia es la varias plu presada cual impulsa condui.

Wundt no acorda con William James e la teoria James-Lange de emosias. James ia crede ce prima nos responde a un situa, e alora nos esperia la emosia. Wundt ia indica ce introspeta mostra clar ce la emosia veni prima, e sola alora la fisiolojia e condui segue.

El ia crede ce nos no pote ariva a un lista ordinada de emosias: Los misca e fusa con lunlotra tro multe. Ma nos pote determina alga dimensiones de cualias con cual nos pote descrive los, con tre dimensiones spesial

1. Plase e desplase

2. Inspira alta e inspira basa

3. Atende tensada (pd controlada) e atende destensada.

Vole

Wundt ia crede ce atas de vole, eleje e deside es tan sinifiante per comprende psicolojia ce el ia nomida sua teoria "psicolojia voliste".

Vole es vera motiva, e ata voleda es condui motivada. Lo veni de un sintese creosa de otra cualias emosial. Studiante de psicolojia tipal oia de la esperimentas sur tempo de reata en studia la contribuis de Wundt. Wundt ia vide los como studias de volunta.

La rexerca en sua laborerias sur volunta ia influe la fenomenolojiste beljes Albert Michotte, ci alora influe psicolojistes como Fritz Heider, Kurt Lewin, e Leon Festinger, ci ta es multe influente en la spesiali nova nomida psicolojia sosial.

Vole e atas de vole pote estende de impulsas e atas automata e cuasi reflexe, a desides e atas complicada cual nesesa multe fortia. Multe atas controlada deveni automata tra tempo, cual alora libri nos per labora de vole an plu complicada. En fato, lo ia es la developa de pensa lojical cual Wundt ia vide como la forma de vole la plu alta cual umanas pote es capas. El ia es multe otimiste sur nosa potensia!

Plu

Wundt ia continua per deveni la xef de "psicolojia induida" a Zurich en 1874, e alora deveni profesor de filosofia a Leipzig en 1875. Ala el ta abita e labora per la 45 anios seguente.

En 1875, un sala ia es dedicada per demostras de cual nos nomi aora sensa e persepi. Esta es la mesma anio en cual William James ta institui un laboreria simil a Harvard. Nos pote selebra acel anio como la funda de psicolojia esperimental.

En 1875, Wundt ia aida sua studiante graduada prima a rexerca psicolojial vera - un otra petra de milia. En 1881, el ia inisia la "Jornal de Studias Filosofiste". En 1883, el ia comensa la curso prima titulida psicolojia esperimental. E en 1894, sua laboras ia es recompensada con la institui ofisial de un "Institui per Psicolojia Esperimental" a Leipzig - la prima en la mundo.

Wundt ia es conoseda par tota como un rexercor cuieta e un rexercor metodolojial ci labora forte, e un presentor de lesones multe bon. La normas de alora ia es diferente de los de aora: El ia parla per oras con un vose cuieta, sin notas o aparatos audiovideo, e sin pausa per demandas. Sua studiantes ia ama el, ma nos ta, sin duta, critica el per no es sufisinte divertinte!

Lo es interesante per nota ce en esta periodo multe ocupada, el ia publica cuatro libros en filosofia! Recorda ce, en esta periodo, psicolojia no ia es videda como separada de filosofia. Vera, Wundt ia rejeta la idea cuando algun ia sujesta lo a el.

La studias cual ia es conduida par Wundt e sua studiantes - aora multe - ia es xef sur sensa e persepi, e de los, la plu ia es sur vide. En ajunta, on ave multe studias sur tempo de reata, atende, emosias, e asosias. En tota, el ia supravide 186 teses dotoral, la plu en psicolojia.

Entre sua studiante plu reconoseda ia es Oswald Külpe e Hugo Munsterberg (ci ia es invitada per ensenia a Harvard par James), la conduistes rusce Vladimir Behterev e Ivan Pavlov, e studiantes american como G. Stanley Hall ("padre" de psicolojia de developa en la SUA), James McKeen Cattell, Lightner Witmer (fundor de la clinica psicolojial prima e la SUA, a la Universia de Pennsylvania), e la interpretor xef de Wundt per la mundo engles, E. B. Titchener. Nonfortunosa, Titchener es spesial culpable per malinterprete Wundt.

Plu tarda en sua carera, Wundt ia deveni interesada en psicolojia sosial o cultural. Contra cual multe sabe, Wundt no ia pensa ce la studia esperimental de sensas ia es la tota de psicolojia! Vera, el ia crede ce lo ia es sola la surfas, e ce la plu de psicolojia no es capas de usa metodos esperimental.

En loca, el ia pensa ce nos debe prosimi psicolojia cultural tra la produidas lo produi - mitolojia, per esemplo, praticas e rituos cultural, leteratur e arte... El ia scrive un obra de des volumes nomida "Volkerpsychologie" (psicolojia etnical), cual ia es publica entre 1900 e 1920 e ia inclui la idea de pasos de developa cultural, de la primitiva a la eda de totemes, tra la eda de eroes e dio, a la eda de umania moderna.

En 1920, el ia scrive "Erlebtes e Erkanntes" (esperias e reconoses), sua autobiografia. Un tempo corta a pos, a 31 agosto 1920, el ia mori.