檳城蝦麵

福建蝦麵，又叫福建麵，係一樣東南亞料理，其中以馬來西亞檳城同新加坡嘅最具代表性，係一道利用蝦殼同辣椒熬煮嘅赤紅辛辣湯底，再配上黃麵條、米粉、蝦同蕹菜等而成嘅麵食料理。

好多馬來西亞同新加坡嘅華人餐廳同美食中心都可以揾到佢嘅踪跡，深受當地華人歡迎。

來歷

檳城蝦麵據說係由早期移民至檳城島嘅福建人所研發。喺日據時期，捕撈嘅魚產都只可以賣畀日本軍人，於是當地嘅福建漁民只好將剩低嘅蝦殼、蝦頭熬成湯，再配上黃麵，繼而創出呢道庶民美食。

亦有人指出呢道係福建流傳嘅食物，喺泉州一帶叫做蝦麵，隨住華裔老一輩去到南洋，再加啲南洋辛香料，形成咗呢個麵^[1]。

將蝦殼同蝦頭以及紅蔥頭、薑等辛香料一齊放入熱油爆炒，之後再加入辣椒去腥，用布袋將炒過嘅蝦殼包埋一齊，同豬大骨、沙葛熬成湯頭。跟住用開水汆燙好黃麵、米粉、蕹菜後，同肉片、豆芽、水煮蛋一同放入碗裏面，加上湯頭，最後加入參巴辣椒醬，就係一碗傳統檳城蝦麵。

喺吉隆坡同南馬一帶，參巴辣椒醬會裝喺一旁嘅小盤子裏面，食用方式係用筷子蘸啲辣椒醬去麵度，再送入口，同檳城直接將辣椒醬拌入湯內嘅食法有啲唔同。福建麵除咗上述所提及嘅配料之外，仲可以附加燒肉、燒腸、魚丸、雞腳、粉腸等，麵類亦唔限於黃麵同米粉，可以選擇粿條、伊麵、「美極」即食麵（Maggi麵）、粗米粉等。