Läntor

Läntor
Лянтор

Lidnanznam	Flag
Valdkund	Venäma
Eläjiden lugu (2021)	40,977 ristitud
Pind	63,07 km²
Pämez'	Aleksei Lucenko (sulaku 2023—)
Telefonkod	+7−34 638-xx-xxx
Avtokod	86, 186
Aigvö	UTC+5 (MSK+2)

Läntor (ven.: Лянто́р, ukr.: Лянто́р, tot.: Ләнтор, лянт тор «lumekaz järv» hantin kelespäi) om Venäman lidn da lidnankund Hantin da Mansin avtonomižen ümbrikon keskuses. Se mülüb Surgutan rajonha.

Istorii

Eländpunktan aluz om pandud vl 1931 kuti kalanpüdajiden rahvahaline Pim-žilo, nimitihe jogen mödhe. Vl 1966 avaitihe kivivoin da sen gazan Läntoran löudmižsijan, nimitihe Läntor-Tuhlor-järven mödhe. Vl 1978 sauvoškanzihe kivivoin sajiden žilod Piman sijas, udesnimitihe sidä Läntorskii-žiloks. Vn 1992 18. päiväl semendkud se sai lidnan statusad nügüdläiženke nimenke.

Läntor šingotase kivivoin samižel («Läntorneft'»-kompanijan ühesa löudmižsijad lidnan ümbrištos, «Surgutneftegaz:an» pala) i kivivoingazan ümbriradmižen tegimel.

Geografijan andmused

Lidn sijadase Pim-jogen hural randal (ven.: Пим 390 km pitte, Obin oiged ližajogi), 55 m ü.m.t. keskmäižel korktusel. Vačim-Jagun-jogi lankteb Pimha lidnas. Läntor om ümbärtud penil järvil.

Matkad Hanti-Mansiiskhasai om 182 km suvipäivlaskmha orhal vai 365 km avtotedme. Lähembaižed lidnad oma Surgut (lähembaine raudtestancii da rahvahidenkeskeine lendimport avtotedme) 77 km suvipäivnouzmha orhal vai 92 km avtol i Neftejugansk 64 km suvhe orhal vai 134 km avtotedme.

Tobmuz

Läntor om lidnankundan üks'jäižeks eländpunktaks. Lidnankundan pind — 87,56 km².

Lidnankundan tobmuden pämez' om sen Administracijan pämez'. Edeline Administracijan pämez' om Sergei Mahinä (semendku 2004 — reduku 2022). Lidnan Deputatoiden nevondkundan ezimez' om Irina Dolmatova vn 2023 redukuspäi. Edeline nevondkundan ezimez' om Aleksandr Nelübin (reduku 2018 — reduku 2023).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 38 992 ristitud, rajonan koumandez. Kaik 39 841 eläjad oli lidnas vl 2017. Kaikiš suremb lidnan ristitišt oli 40 135 eläjad vl 2015 i 41 199 eläjad vl 2020.

Rahvahad (enamba 0,8 % vl 2010): venälaižed — 51,4 %, totarlaižed — 9,8 %, ukrainalaižed — 8,1 %, baškiralaižed — 4,1 %, kumikad — 3,5 %, tadžikalaižed — 2,4 %, azerbaidžanlaižed — 2,0 %, čuvašalaižed — 1,7 %, čečenalaižed — 1,4 %, lezgilaižed — 1,2 %, nogailaižed — 1,1 %, uzbekad — 1,1 %, armenijalaižed — 0,8 %, kazahlaižed — 0,8 %, toižed rahvahad — 6,6 %, rahvahuden ozutandata — 4,0 %.

Ortodoksižen hristanuskondan kaks' jumalanpertid oma saudud lidnas 1990-nziš vozišpäi: Jumalanmaman Katken i Venäman uziden moknikoiden da hengenavaidamižen kundlijoiden. Islaman pühäpert' om avaitud.

Lapsiden opendusen aluzkundad oma kuz' päivkodid, viž keskškolad (nomer 3, 4, 5, 6, 7), kaks' čomamahtoiden školad, lapsiden sädamižen keskuz, sportškol. Läntoran kivivointehnikum (Jugran valdkundaližen universitetan filial) om lidnan professionaližen opendusen aluzkundaks.

Galerei

• 
  Läntoran hantin etnografižes muzejas (2023)
• 
  Elektrine järgenduzstancii 110 kV vl 2012
• 
  Estin teradnikoiden mikrorajonas (2023)

Irdkosketused

• Lidnan tobmuden aluzkundoiden sait (admlyantor.ru). (ven.)