Nationale Militärgeschichtsmusée

Den Nationale Militärgeschichtsmusée (Musée National d'Histoire Militaire Diekirch) ass e Musée zu Dikrech, deen als Haaptthema d'Ardennenoffensiv huet.

Am September 1984 huet e seng Paarten ënner dem Numm "Dikrecher Geschichtsmusée", um Terrain vun der fréierer Brauerei Drüssel, opgemaach.^[1]

Themen an Exponater

De Musée zu Dikrech presentéiert op eng neutral Manéier d'Militäroperatioune vun der Ardennenoffensiv am Wanter 1944-45. Eng Rei vun Dioramaen a Liewensgréisst, thematesch Ausstellungen, Waffesammlungen, Uniformen, militäresch Gefierer an Ausrëschtunge vun all Zort, original Fotoen a perséinlech Géigestänn vun Zaldoten erzielen ganz konkreet vum militäreschen Aspekt hier d'Geschicht vum 2. Weltkrich zu Lëtzebuerg.
Zanter 1993 gëtt an engem 2. Deel d'Geschicht vun der Lëtzebuerger Arméi, vun 1881 un, behandelt. De Schwéierpunkt läit dobäi op den Zukunftsperspektive vun der Arméi am Kader vun hiren Engagementer an der NATO, der UNO an an der Europäescher Unioun.
En 3. Aspekt dee behandelt gëtt ass d'Undenken un d'Anciens Combattants Luxembourgeois aus dem 1. an 2. Weltkrich an aus dem Koreakrich.
E Centre de Recherche et de Documentation an e pedagogesche Service ronnen d'Offer vum Musée of.

Wéini op ass

Vun dënschdes bis sonndes: vun 10:00 bis 18:00 Auer
All méindes, geneesou wéi den 1. Januar, Fuessonndeg an de 25. Dezember ass zou.
De 24. Dezember an den 31. Dezember: vun 10:00 bis 16:00 Auer