Nueva Rusia

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Ta a confederación feita por a unión d'as provincias separatistas d'Ucraína se veiga Estau Federal de Nueva Rusia

Nueva Rusia (en ruso Новоро́ссия, Novoróssiya) ye un termin historico que se feba servir en tiempos de l'Imperio Ruso mientres o sieglo XIX ta definir a o territorio d'a costa norte d'a mar Negra (hue fa parti d'o sud d'Ucraína, sud de Rusia, Besarabia y Transnistria). A parti occidental de Nueva Rusia (entre os ríos Dniéster y Dniéper) yera conoixida como Yedisán por os otomans y heba estau antis habitada, chunto con a parti central, por restos d'as hordas Nogáis. O termin cubre rechions historicas d'os Campos salvaches y Besarabia.^[1]

L'Imperio Ruso fue ganando control sobre ista zona gradualment en tractaus de paz con l'Imperio Otomán dimpués d'as guerras ruso-turcas de 1735–39, 1768–74, 1787–92 y 1806–12. A colonización d'a tierra, en zaguerías d'o sieglo XVIII, fue dirichida por o prencipe Potiomkin a qui a emperatriz Catarina "la Gran" atorgó poders de gubierno absolutos sobre o territorio. As tierras se'n dioron chenerosament a la nobleza rusa (dvoryanstvo) y se tresladó a campesins rusos y ucraineses, en rechimen de servitut, ta cautivar lo que dica alavez yera una estepa tasament poblada. Tamién vinioron colonos foranos convidaus por Catarina "a Gran" dende Alemanya (que se convertioron en os alemans d'a mar Negra), Polonia, Italia, Grecia, Serbia y atros países.

Dende 1754 se i establioron nuevas ciudaz como Yelisavetgrad (actual Kropyvnytskyi), Novorossiysk, Yekaterinoslav (actual Dnipró), Nikoláiev (Mykolaiv), Kherson, Mariúpol, Melitopol y Odessa. En termins actuals, comprende as provincias ucrainesas (óblasts) de Donetsk, óblast de Lugansk, Dnipropetrovsk, Zaporizhia, Mykolaiv, Kherson, Odessa, parti de l'óblast de Kirovogrado; en Rusia, a provincia de Rostov del Don, o krai de Krasnodar, o krai de Stávropol, y as Republicas Autonomas d'Adiguesia y Crimea; y en la Republica de Moldavia as rechions de Besarabia y Transnistria .

En materia política, parti d'a población que vive en istas rechions (mas que mas en Donbás) tien una orientación pro-rusa, y mesmo en as partis que no son incluyidas actualment en a Federación Rusa o idioma ruso ye o predominant. En as eleccions parlamentarias de 2006 en Ucraína, o Partiu d'as Rechions (pro-ruso) aconsiguió a mayoría en as provincias que se troban en lo que estió Nueva Rusia. En Moldavia, a rechión dita Transnistria declaró a suya independencia. As luengas oficials d'ista rechión separatista son o ruso, o moldavo y l'ucrainés y ye refirmada por Rusia. Todas istas rechions tienen tamién un alto porcentache de población etnicament rusa.