Міхась Скобла

Міхась Скобла
Міхаіл Уладзіміравіч Скобла
Асабістыя звесткі
Імя пры нараджэнні	Міхаіл Уладзіміравіч Скобла
Дата нараджэння	23 лістапада 1966(1966-11-23) (57 гадоў)
Месца нараджэння	Пяляжын, Дзярэчынскі сельсавет, Зэльвенскі раён, Гродзенская вобласць, БССР, СССР
Грамадзянства	СССР, Беларусь
Альма-матар	філалагічны факультэт БДУ
Месца працы	Роднае слова Беларускі кнігазбор Радыё Свабода Народная Воля
Прафесійная дзейнасць
Род дзейнасці	эсэіст, перакладчык, празаік, паэт, парадыст
Кірунак	паэзія
Жанр	верш, паэма, эсэ
Мова твораў	беларуская
Грамадская дзейнасць
Член у	Талака Саюз беларускіх пісьменнікаў
Прэміі	Прэмія імя Алеся Адамовіча (2000) Залаты апостраф (2016) Гліняны Вялес (2016) Прэмія імя Панцеляймона Куліша[d] (2020)
Узнагароды	Воін Святла[d] (2016)
Медыяфайлы на Вікісховішчы

Міхась Уладзіміравіч Скобла (23 лістапада 1966, вёска Пяляжын Зэльвенскага раёна Гродзенскай вобл.) — паэт, эсэіст, перакладчык, парадыст, даследчык літаратуры.

Біяграфія

Скончыў Дзярэчынскую СШ (1984) і беларуска-рускае аддзяленне філалагічнага факультэта БДУ (1991). У канцы 1980-х гадоў быў удзельнікам таварыства «Талака», якое займалася адраджэннем беларускай культуры.

Працаваў намеснікам галоўнага рэдактара часопіса «Роднае слова» і выдавецтва «Беларускі кнігазбор», у Міністэрстве культуры і друку, вёў аўтарскую праграму «Вольная студыя» на Радыё Свабода (1998—2017). У 2017—2023 гадах — аглядальнік газеты «Народная Воля».

Сябра Саюза беларускіх пісьменнікаў (з 1991), з’яўляўся намеснікам старшыні СБП (2002—2010).

Жанаты. Мае дачку Сафію і сына Вячаслава. Жыве ў Мінску.

Творчасць

Аўтар кніг «Вечны зніч» (1990), «Розгі ў розніцу» (1993), «Вочы савы» (1994), «Камень-перунок» (1998), «Дзярэчынскі дыярыюш» (1999), «Нашэсце поўні» (2001), «Акно для матылькоў» (2009), «Вольная студыя» (2009), «Саркафагі страху» (2016), «Камізэлька для месяца» (2016), «Выспятак ад Скарыны» (2017). Укладальнік паэтычных анталогій «Краса і сіла: беларуская паэзія ХХ стагоддзя» (2003) і «Галасы з-за небакраю: паэзія свету ў беларускіх перакладах ХХ стагоддзя» (2008).

Уклаў і пракаментаваў выдадзеныя ў серыі «Беларускі кнігазбор» аднатомнікі Уладзіміра Жылкі (1998), Ларысы Геніюш (2000), Рыгора Крушыны (2005), Рыгора Барадуліна (2008); а таксама зборы твораў Алеся Салаўя (2010), Ларысы Геніюш (у 2 тамах; 2010), мемуарныя зборнікі Мікалая Улашчыка (2016) і Міхася Стральцова (2017). Апублікаваў тамы эпісталярнай спадчыны Ларысы Геніюш — «Каб вы ведалі» (2005) і «Лісты з Зэльвы» (2012), Зоські Верас — «Я помню ўсё» (2013) і «Пакуль рука пяро трымае» (2015).

У кнізе «Высьпятак ад Скарыны» (2017) сабраны блогі і дыялогі Міхася Скоблы, у якіх аўтар прапануе свой адказ на пытанні: чаму Скарына бы радаваўся, на што гневаўся, чым цешыўся, за што і каму даў бы выспятка ў сённяшняй Беларусі.

Прызнанне

• Лаўрэат літаратурнай прэміі Ведзьмака Лысагорскага (1988).
• Лаўрэат літаратурнай прэміі імя Алеся Адамовіча (2000).
• Лаўрэат прэміі часопіса «Дзеяслоў» «Залаты апостраф» (2016).
• Лаўрэат прэміі «Гліняны Вялес» (2016).
• Лаўрэат Міжнароднай прэміі «Воін святла» (2016).
• Лаўрэат Міжнароднай літаратурна-мастацкай прэміі імя Панцеляймона Куліша Архівавана 13 чэрвеня 2021. (2020).

Узнагароджаны медалём 100 гадоў БНР Рады Беларускай Народнай Рэспублікі.

• 
  Міхась Скобла ў час сваёй лекцыі аб жыцці і творчасці Рыгора Барадуліна (1935—2014), беларускага паэта. Мінск, 28 сакавіка 2014 г.
• Міхась Скобла расказвае, як Рыгор Барадулін за пераклад на беларускую мову паэтаў Каўказа (Дагестана, Чачні і інш.) атрымаў у падарунак бурку, папаху і сертыфікат на валоданне пляцам зямлі ў вёсцы (ауле) Карата Ахваскага раёна Рэспублікі Дагестан. Мінск, 28 сакавіка 2014 г.

Літаратура

• Скобла Міхась (Міхаіл Уладзіміравіч) // Беларуская энцыклапедыя: У 18 т. Т. 14: Рэле — Слаявіна / Рэдкал.: Г. П. Пашкоў і інш. — Мн. : БелЭн, 2002. — Т. 14. — С. 465. — 10 000 экз. — ISBN 985-11-0035-8. — ISBN 985-11-0238-5 (т. 14).
• Скобла Міхась // Дзеяслоў: Нашы аўтары — Эл.рэсурс dziejaslou.by
• Водгульле ХХ стагоддзя: «Галасы з-за небакраю» // Наша Ніва on-line: Літаратура / 12:33, 19 верас. 2008 — Эл.рэсурс nashaniva.by

Спасылкі

• Артыкулы спадара Скоблы на Радыё «Свабода»
• Скобла Міхась (Міхаіл Уладзіміравіч) на сайце анлайн-энцыклапедыі «Беларусь у асобах і падзеях»
• Міхась Скобла. Вечны зніч (зборнік вершаў) (1990) (аудыё)